2016

S Angie Merkel, die isch hässig und fruschtriert
Ab all däm wo in Köln und and?re Städt bassiert
"Das isch verächtlig" seit si, "dräggig und gemein
So vyyli Flüchtling, numme mi begrabscht e kein!"

In China darf me jo, das freut nit nur dr Maa
Nit nur no ei Kind sondern jetzt zwei Kinder ha
Uns dunggts scho lang dass es mee Kinder dört verdreit
So wärde d Turnschueh nämmlig dopplet so schnäll gneiht

Jä, dr Urs Fischer füült sich z Basel langsam heimisch
Au wenn er seit, dass do nit alles wie deheim isch
Us Ziiri kennt är mängs halt nit, es tönt zwar hohl
Zum Bischbyyl schreggt är hüt no uff bi jeedem Goal

Dr gleini Fritz seit an dr Kasse: "Mami, los!
I wott das Spiilzüg und die Schoggi do, die gross
Und no e Snickers und e Saft vo Annas Best
Und wenn de jetzt nit spuursch, no mäld i das dr KESB"

Im Zirkus Knie gits bald scho, wäg dr schlächte Haltig
Elefante nüm im Zält, das freut ys gwaltig
Duet me so runzlig diggi Tier denn deert verdamme
No göhn mir s näggscht mol denn halt ooni Schwiigermamme

Rein mathematisch gsee goots nit, doch wärs no schlau
Im Bundesroot ei Hälfti Maa - ei Hälfti Frau
Ei Lösig gäbts no könntsch die Zämmesetzig ha
D Martullo Blocher isch halb Frau und halb e Maa

"Du Mami, lueg emol" rieft d Miriam im Zolli
"Lueg döört die Pinguindame, gäll das isch e tolli!
I ha die Pinguindame glaub i scho mol gsee!
Die schwätzt arabisch und isch oft im Eglisee!"

Jä hän si gwüsst, die Schnierlischrift, die isch passé
Zämmehängend schriibe kasch bald kein meh gseh
Dr Eric Wäber duet's nid nur uf d'Schrift beschrängge
Dä duet jo nid emol meh zämmehängend dängge

Bi dr Kulturpauschale sin si pauschal stuur
Me seit im Baselbiet "mir bruuche kei Kultur!"
Derby wär Lieschtel als Kulturstandort no schlau
Mir stelle euch jetzt das Theater do zur Schau:

Dr Baselbieter z unterhalte wär nit tüür
Do längt e Bier, e Klöpfer und e Höhefüür
d Komödie könnti d Pegoraro z Lieschtel mache
will wenn die d Schnuure uffmacht muess jo jede lache
  
Dr Thomas Wäber stygt jetzt d Bühni au empoor
Er präsentiert sich stolz, doch keine nimmt en woor
Und s Moni Gschwind stoot numme do und hebt e Bääse
Sie zeigt so exemplarisch ihres ganze Wääse

Dr Isaac Rääber nimmt si Goschdyym nüm vom Ständer
äär hänggt scho bsoffe bi dr Aulatür im Gländer
Zum Schluss sorgt eine für dr Höhepunkt vom Ganze
Für s grosse Drama zeigt dr Lauber no d Finanze

Nach däm Spektakel goht d Regierig zfriide hei
Und losst s ganz Publikum in all däm Drägg ellei
Und trotzdem juublet deert frenetisch jede Rammel
Und alli singe stolz "vo Schönebuech bis Ammel"

Jä Sii, die SVP, die wott, das git ys z dängge
Will's iine nit so basst, dr Uni-Deal versängge
Hejo, s isch glaar, wänn die kei Gäld fir Bildig gsee
Will wär jo bildet isch, da wäält nit SVP

Dr Ueli Muurer seit bim Zmorge zu dr Frau
"Dass ich Finanzminischster bi, dasch nit so schlau
wenn ich die Zaale nämmlig gsee, no wird i muff
I fall jo zwische deene Nulle gar nüm uff"

S Schwyzer Färnseh, das muess spaare, ?s sin d Finanze nüm im Loot
Und so prieft me jeedi Sändig, wo me spaare ka zur Noot
Drumm hän mir ys au mol Zyt gno und durchs Programm duure zappt
Mir verzelle euch jetzt was me do derby erläbt

Und so hän mir zwei denn gstartet, grad bim aller erscht Kanal
Dass um die Zyt Horrorfilm scho laufe, isch doch nit normal
Me muess fascht bräche, es isch scheusslig was me do so alles gseet
No merke mir, jä nei, dasch d Widmer Schlumpf bi ihrer Abschiidsreed

Grad nach däm Schogg do hän mir dänggt, e bizli Teletext wär rächt
Do isch alles nit so gruusig, und au d Übersicht nit schlächt
Sogar e Zürcher het im Teletext denn bald mol alles gfunde
So isch dr FCZ zur Eifachheit am Bildschirmrand ganz unde

E Sänder dieffer, s Telebasel isch ganz neu, es isch e Gschängg
Doch s einzig Guete an däm Sänder, jo das blyybe d Schnitzelbängg
No hämmer umgstellt zrugg uffs Eins, wenn das so witter goot denn mord y
Es lauft die Stadlshow und s kreischt derzue die närvig Francine Jordi

Für dr niveaudieffschti Knüller sorge Giacobbo und Müller
Im Verglyych sin sogar d Lottozaale no dr grösser Brüller
Im 10 vor 10 do zeige si denn scho die näggschti Horrorgschicht
Diesmol ooni Widmer Schlumpf, nei s isch dr Merkel iires Gsicht

Zu spooter Stund zeigt dr Schawinski, dass s no dieffers Niveau git
Für sini grossi Schnuure längt dr aller breitischt Färnseh nit
Es längt! Dr Färnseh fliegt zum Fänschter use, mir sin voll bedient
Jetzt wüsset ihr derfür für was dir alli Billag zaale diend!

2014

Dr Carlo Conti het grad nach sym Ruggdritt gsait
"I ha dr Überbligg verloore, s duet mir laid
Will wenn ich d Speese kontrollier, s isch ganz verreggt
Do sin d Beträg bim Lääse vo mym Schnauz verdeggt"

Gäbs au z Lieschtel so Atomkärn-Reaktore
Wäri s'Baselbiet scho zimmlig gly verloore
Dr eint Atomkärn seit: "Kumm, loss-ys diskutiere"
Do seit dr ander: "Nei, mir wei nit fusioniere"

Wo mir im Klingeli mol znacht sin go flaniere
Do wott e feschti, dunggli Dame uns verfiere
"Jetzt mien mir hööflig sy" sait är mir do derby
Me waiss jo nie, das könnti d Oprah Winfrey sy!

Ohje ohje ohje ohweh ohje ohje
Ohweh ohje herrjeminee ohwe ohje
Ohjeminee ohje ohweh ohje ohje
Jä, in däm Värs - dä merkschs - do goots um d BVB

Mir hän Verständnis für dii, liebe Bobadilla
Dass du jetzt in dr Bundesliga wottsch go spilla
D Verloggig isch halt gross - und s wird sich für di loone
Schyyns gääbs in Augsburg nämmli kuum e 30er Zoone

Dr Hambbe Wessels sait bim Schmuuse sin?re Frau:
"I fahr in d'Stadt und hol Kondom, du geili Sau!"
Doch won är zrugg kunnt, schlooft sy Frau denn scho sit Stunde
"Mi Schatz, schloof witter du, y ha kei Parkplatz gfunde!"

Dr Kim Jong Un, dä fetti Bueb, sait zu sym Mami
"Das Znacht wo d kocht hesch, isch voll super - jammie jammie
Nur dr Wysswyy isch bitz suur, i wott e Siesse
Due doch ein hoole rasch, sunscht lohn i di verschiesse"

So toll, dr Fümoar-Club wott nomol rekurriere
Die könne s Rauchverbot partout nit akzeptiere
Jetzt frooge mir ys langasam, nämmeds uns nit krumm
Jä, macht am Änd vom Daag das Rauche bizli dumm?

Sit d Angie Merkel wieder gwäält isch vo de Schwoobe
Zaigt dr Muulwinggel vo iire lyycht nach oobe
Doch sit em Langlaufunfall isch die Freud verflooge
S het iire d Schnuurewinggel wider aabe booge

Dr Eric Wäber hän mir gsee bim Käppeli Joch
Do zaigt dä Arsch uns allne stolz sy Fuudiloch
Doch uns zwai stöört das nit, mir bligge langsam duure
Dr grööser Schyssdrägg kunnt bi däm jo uss dr Schnuure

S isch nüt me ghaim, nit über Sii und Sii und Sii
Nit über Sii und Sii und Sii und mii und dii
Nit, wo dä Herr do vorne geschter Znacht gsi isch
Nit wie viel Trinkgeld du däm nätte Frölein gisch
Jä, au nit, dass du hütt kei Unterhösli draisch
Nit was d bim Schaffe als dr Sekretärin saisch
Nit wo d am Morge gosch go seggle, s isch bekannt
Jä, si waiss alles, was passiert, in jedem Land
Jedes SMS und E-Mail wo de schribsch
Ob d'bim Bierli trinke amme übertribsch
Was de heimlich zoobe googlisch, si waiss Bschaid
Welle Morgerogg bim Zmorge d Merkel drait
Wie lang d im Durchschnitt mit dr Noochberin duesch reede
Dass dr Blatter schmiirt, jä guet, das waiss jo jede!
Sie weiss au säll, sie weiss au jenes und das au
I main nit d NSA, i red vo mynere Frau

2013

No kuum im Amt, scho gohts bim Baschi richtig los
D Villa Rosenau hett brennt, dr Schock isch gross
Wo-n-er d'Bewohner seht, verzwiiflet, voller Äsche
Meint er: "Dasch halb so schlimm, das ka me wieder wäsche!"

Ufem Skilift triff ich letschti d'Lara Guet
Y frog, wurum si für Ragusa wärbe duet
Das passt zum Skiteam, seit sii ? ob ich das nid wüss
In beidem heygs in erschter Linie e Huffe Nüss

Wäg däm Styyrstrytt schreie d'Medie unverfroore
D'Widmer-Schlumpf heyg do derby ihr Gsicht verloore
Doch wägge däm muess sich die Frau jo nit schiniere
Bi som'ne Gsicht wär mängge froh er wurds verliere

Dä Red-Bull-Östriicher hett doch ächt e Knall
Nyynedryssig Kilomeeter freie Fall
Doch dr Rekord sigs nid, dr Somm losst d Korke knalle
Jä will sii BaZ, die isch no dytlig dieffer gfalle

Bi dr Novartis sait d Laboor-Muus 70C
"Vo dääre Spritzi hätt i gärn no aini mee
No zwai, drei Pille und y ha e gueti Chance
Uff dr Titel bi dr näggschte Tour de France!?"

Die dieffi Frauequote bringt ys zwai in Rage
Drumm fordere mir mee Fraue in dr Chef-Etage
Deert kennt me s'wyyblig Potential strategisch nutze
Zem effiziänt und suuber s'Männer-WC butze

Es lääbe siibe Milliarde uf dr Äärde
Die Zaal isch gwaltig hoch, do ka's aim drimmlig wärde
Drumm frooge mir euch jetzt, in dääne schwääre Stunde
Hätt me do wirgglig kain anstell vom Morin gfunde

Letscht Novämber hänn mir dä Titanwurz bsuecht
Si, dä stinggt denn also grässlig, ganz verfluecht
Es rympft aim d Naase, er het broche, ich ha ghüült
Mir hän ys irgendwie wie im'ne Fümoar gfüült

Dr Hambbe Gass hoggt in sym Stuehl, in aller Rueh
Und luegt hypnootisch still sym Bildschiirmschooner zue
Druffaabe dööst er yy und träumt bitz vo sym Loon
Und stöönt denn ganz erschöpft: "S isch Zyt fir my Pension!"

Jetzt muesch guet luege, da?sch e Hund und das e Katz
Das e Nilpferd, das e Aff, das deert e Spatz
Das do links, das isch e Zebra, das e Bär
Y glaub für euch isch das bishär nid allzu schwäär
Doch jetzt gohts witer, do e Fisch und do e Hirsch
Das wo'd do sehsch, das isch ä Tiger uf dr Pirsch
Dr Elephant sehsch do, dä riesigi Koloss
Und jo, das Rindfleisch, wo do in isch, isch vom Ross

2012

Es sait im Kindergaarte, schyych, die glai Christina
Si spiil am liebschte mit der neue Plüschvagina
Jetzt isch sy uffgläärt, numme het sy halt sithäär
Am Oobe Angscht im Bett vor iirem Teddy-Bäär

Es het d'Finanzuffsicht de Amis unschiniert
E Huffe Daate gschiggt, doch immerhin kodiert
Total verschlüsslet, kaschs nit lääse, nüt meh passt
Will all die§ Daate sinn uff Ziiridytsch verfasst

E Verkeerskontrolle stoppt der Hambbe Gass
Syni Raiffe syge-n-alt, do wird äär blass
Schlussäntlig wird der Schugger ärnscht und sait subtil
Herr Gass, zem wyter faare bruuche si Profil

S'Trio Blocher, Köppel, Somm isch ganz erreggt
Sy hänn bim Hildebrand am Schtägge Drägg entdeggt
Mir versteen se jo und dien drumm au nit muule
Jä, wo's vyyl Drägg git geen sich d'Säu halt gärn go suule

Mir mien jo zue gää, jungi Maitli, die hänn Charme
Doch nur bi alte Fraue wirsch so wirgglig waarm
So richtig gsetzt und ryff, erfaare-n-und biz groob
Jä halt so ungfäär wie das Gammelflaisch vom Coop

Der Schwyzer Skisport, dä isch groos und alli freuts
Die schnällschte sinn der Didier Cuche und au der Feuz
E dritte hänn mir no, au dä isch grandios
Die schnelli Daalfaart vom Tschagajew isch famos

Noch ere Liebesnacht mit Wyy fir sii und mii
Huucht sii zäärtlig in my Ohr 'bisch super gsii'
"Dini Mainig isch nit wichtig" sag y stuur
"Es zellt nur d'Mainig vo der Rating-Agentur"

Der Schwyzer Schwarzgäldmäärt, dä isch am implodiere
D?Bangge deerfe nim dy Styyrsatz optimiere
Wenn'd also Gäld z'verstegge hesch und findsch kai Blatz
No inveschtiers am beschte unbemerggt in d'BaZ

Em Christian Wulff sy Ruef, dä isch jetzt ruiniert
Nur het d'Empeerig uns derwääge irritiert
Er bschysst, er droot, er liegt, er kennt au kai Kritigg
Jä Sii, dä basst doch optimal in d'Bolitigg

Akute Stuehlgang het ys letschti iberkoo
Drumm hänn mir schnäll zem butze d'Tageswuche gnoo
Jetzt isch sy bruun und stinggt, so dängge mir ys bald
Jetzt hett der Blocher sich au d'Tageswuche krallt

Am ainezwanzigschte Dezämber wird's passiere
Lutt Expäärte wird denn d'Ärde explodiere
Nur no eppis ka-n-ys rette, doch s'pressiert
Zwoor dass der Constantin dergeege rekurriert

Das roschtig Fessehaim lauft wyter, s'isch e Hohn
Doch birgts au Chance fir die ganzi Region
Wenns nämmli dätsche sett und s'waiht dy vo de Stelze
So dien mir gmainsam, iber d'Gränze wägg, verschmelze

2011

Im Alter Kinder kriege liggt hüt voll im Trend
Unser Groosi het das letschti au erkennt
Synergie nutzt si, das isch do dra s'Geile
Jetzt ka si mit em Buschi ihri Windle teile

Jä Si, die Freud do dra, lehn mir ys nit lo näh
Es het im Bundesrot e Frauemehrheit gäh
S'lauft zwor nit besser so, de facto s'het nüt gnutzt
Derfir isch s'Bundeshuus jetzt immer suber putzt

In Kalifornie hett dr Arnie miesse goo
E riise Schuldebärg het är dert hinterloo
Jetzt sorgt dr Leuebärger deerte für Furore
Er well im Schuldebärg e Basistunnel boore

Z'Basel wirsch fascht dääglig usgraubt und verschlaage
In jedem dunggle Gässli schloots aim uff e Maage
Nur d'Regierig het das erscht grad dementiert
S'sig immerhin sit hit am Morge nyt passiert

Die katholisch Kirche, Sii! Jä, sapperlott
Logg'ret pletzlig s'hailige Kondom-Verbott
So Kondom sinn praggtisch, koschte nit viil Stutz
Und biete glaine Buebe optimale Schutz

Mir fände s'Waffeverbot im Grund gno ganz sympathisch
Nur wärs fir uns dehaim derwääge problematisch
E Froog an d'Männer do, wär kann ys d'Leesig bringe
Wie wurded ihr dehaim sunscht d'Frau zem koche zwinge?

In dr Sauna dräffe mir der Kachelmaa a
Usser Handschelle het dä Bachel gar nüt aa ka
Er sig nit schuldig, sait är, diend ihn doch verschtoo
Er haig nur 'Niiderschlaag' e bizli z'weertlig gnoo

In Ägypte het jo d'Masse demonschtriert
Si hänn ihr Oberhaupt halt nim so ganz goutiert
In dr Schwyz wär das nit meeglig, dasch no guet
Will niemer weiss so rächt wär do regiere duet

Wäg mim Blinddarm muess i dringend ins Spital
Dr Doggter sehts und sait sofort es sig fatal
Grad vor er afoot, sag ich ihm denn im OP
I wott denn zerscht emol di Doggter-Arbet seh

2010

Kurz vor em Znacht, do gheit e Maa in Bääregraabe
Dr Wärter sehts, verschriggt und rieft em Bäär druffaabe
Loss en go, dä Arm, derfir griegsch morn zem Zmörgeli
Denn als Entschädigung dr Blocher und dr Mörgeli

Was sin mir froo, scho jetzt do z'stoo, denn ains isch klar
Im Februar e Fasnacht z'ha isch wunderbar
Denn wär si speeter gsi, das däät is wirgglig schluuche
Jä will dr Merz dä kasch jetzt ächt fir gar nyt bruuche

Herr Gaddafi, was passiert isch duet is laid
Drumm stelle mir fir di e Staatsempfang bereit
Zerscht duet dr Bundesrot di härzlig '?Bärn begriesse
Und nochär dien mir di in Bääregraabe schiesse

Dr Hampe Gass, dä hänn mir gescht im Stucki gsee
Är bschtellt sich Kaviar und s'dyyrschte Lamm-Carré
E so z'diniere könn? är logger finanziere
Hit syg e Baselbieter z?Basel go parkiere

Das Minarett-Verbott bringt vyyli Lyt zem flueche
Drumm sin mir pflichtbewusst dr Dialog go sueche
Dr Ahmed sait is denn: 'Alaah hanu ha halande!'
Mir hänns bim beschte Wille aifach nit verstande

Kasch dr d'Winterferie finanziell nim laischte
Gäbs schiins e-n-andere Wäg, jedoch e zimmlig draischte
Machsch mit 'me Maiteli so primitivi Sache
Scho kasch im Luxus-Chalet z'Gstaad go Ferie mache

Letschti dräffe mir im Fundbüro dr Merz
Was är do suechi frooge mir ihn so als Scherz
E biz verlääge flischt'ret är is denn in d'Oore
Är heigi letscht Joor irgendwo si Gsicht verloore

D'Schwizer Poscht, die sell, zem unabhängig handle
Sich zer vollprivate Aktie-Gsellschaft wandle
Doch mit däm Béglé goot das nit, däm unbequääme
Sunscht wääri d'Poscht denn bald e Ainzelunternääme
Drumm het är dert scho miese go, was fir e Flop
Jetzt hoffe mir är grieggt im Bundeshuus e Job
Nach ei, zwei Möönet hätt er's gschafft, das wär ä Gag
Und au im Bundesroot sinn ändligg alli wäg

Dr Vasella het sich gsait: jetzt dritt-i zrugg
Due zwoor gärn schaffe und s'isch au nit wäg em Drugg
Dr woori Grund derfiir, das sait är dieff bedroffe
Är wäri sunscht denn bald mol in sym Gäld versoffe

Ökologie, jä sii, das liggt hit voll im Trend
Au d'Regierig z'Basel het das scho erkennt
So ka dr Morin sich als 'bio' definiere
Denn im Prinzip kasch dä jo hit scho komposchtiere

E jungi Schwyzere, mental bitz ramponiert
Het z'Rom dr liebi Papscht ganz heftig attackiert
Doch vo uns bikunnt die Frau e riise Loob
Schlussändlig isch dr Papscht jo trotzdäm nur e Schwoob

Si wänn in Minchestai kai Rodscher-Stroos benenne
Jetzt könnt sich d?Roche derfir zem Tennis-King bekenne
Dr neu Turm passi guet, hän sii uns averdraut
Dä syg, wie är jo au, ganz noch am Wasser baut

Mir mien jetzt wyter zie, es isch jo wirgglig schaad
Doch dusse stoot e guete Frind vo uns baraat
Är wott um d'Hyyser zie und nochär no ins Puff
Jä gäll, dä Tiger Woods isch aifach super druff

2009

Mit dere Nano-Technik, s'isch jo ächt no gail
Erforscht me au die aller munzig glainschte Dail
So het me letschti au, das dien si stolz bekunde
Nach langem Sueche denn am Bush sy Hirni gfunde

Mir hän em Ospel jo, falls äär sy Job verliert
S'Amt bi uns als Helgedrääger offeriert
So langsam zwyyfle mir, mir wänn jetzt zwor nit bees syy
Doch zum e Helge draage bruuchsch e gwissi Greessi

Sii, dä Schuehwärfer, dä wirft die Schueh no chic
Drumm mache mir jetzt Drugg, au in dr Politik
Gänd däm Maa Asyl, mir schängge ihm derzue
E Rais nach Bundes-Bärn und 7 Päärli Schueh

Unseri Schwyz, jä d'SVP hetts grad enthillt
Wird vo Rumääne und Bulgaare iberfillt
Doch mir zwai fraien ys, das wird jo ächt e Hit
Wenns prozentual gseh schwyzwyt weniger Ziircher git

Wäg däm «Urknall-Dings do» wird villicht scho glyy
Zerscht mol Gänf und bald denn d'Wält verschwunde syy
S?isch doch nit so schlimm, will wenns denn wirgglig knallt
Verschwindet s'Schwoobeland jo au scho zimmlig bald

Dr Rotscher Federer, mir saage's ohni Hohn
Isch nimmi z'ooberscht uff em grosse Tennis-Thron
Doch au durch das gits neyi Chance, diend nit lache
So kann äär ändligg flyssig Kleenex-Wärbig mache

Das glaine Maitli doo, s'isch erscht grad 13 gsi
Scho fliegt dr Glapperstorch bi ihre-n-au verby
Falls sie jetzt paar Mol sitze blibt, das wird e Spass
Goot sii denn glyy scho zämme mit em Sohn in Klass

Mir hänn bim Altglas trenne wirgglig schampar Mieh
Die bruune doo, die griene deert; jä oder wie?
Drumm hän mir z'Basel au, dr Zwägg hets zwoor verfählt
Denn all die Fläsche promt ins Roothuus yyne gwählt

All die Schwyzer Bangge, es teent villicht biz däämlig
sin uns Schnitzelbängg im Grund gno zimmlig äänlig
will was die Bängger doo dr ganzi Daag dien mache
isch wie bim Schnitzelbangg jo aifach nur zem lache

2008

An schwyzer Unis isch, mir schetze jetz mol groob
Fascht jeede zwait Dozänt mit Sicherhait e Schwoob
uns verwunderets; jä stuunet ihr do nit
dass's iiberhaupt so vyyli gscheiti Schwoobe git

Mir hänn is d'Auge griibe, das ka jo fascht nit syy
Im Skisport sin mir wiider vorne voll derbyy
E gueti Laischtig bringsch, es dunggt ys als wie meh
Wie au d' Martina Hingis, aifach nur uff Schnee

Wo mol s'Gambrinus gsi isch, dien jetz Bagger stoo
Inne alles läär, nur d'Fasaade isch no do
Doch vis a vis d'Frau Blocher fyylt sich wirkligg wool
Es sig fascht wie dehai, deert sinn au alli hool

An der EURO muesch denn griechisch kenne schnuure
Rumäänisch, schweedisch, polnisch, tschechisch, do muesch duure
Doch numme d'Taxifahrer dien sich schyyns no weere
Die mien, will d'Schwyz do spiilt, jetz schwytzerdytsch go leere

20 Minute, News, Punggt CH, Baslerstab
Zoobe haltet aim au s'Heute voll uff Draab
Die ganzi Zytigsfluet, die isch doch voll fir d'Katz
Fir saichte Boulevard-Klatsch, do hänn mir jo scho d'BaZ

Der Ottmar Hitzfäld, Sie, de wird villicht scho glyy
Der nei Schwyzer Fuessball-Nati-Trainer syy
Doch au der Köbi heig e Blaan, e seriöse
Er well im Altershaim go Grytzwoorträtsel lööse

Liebe Marcel, do hesch di bees verspegguliert
Der guet Rueff vo der UBS isch ruiniert
Falls d'denn e neie Job suechsch kenne mir dir saage
Du kasch vo uns uss näggscht Joor unseri Helge draage

E schwaarze US-Bresidänt, kunnt dass ächt guet
Oder am Änd e Frau, ob's die denn wirgglig duet
Doch pletzlig merke mir, und s?macht ys schampar froo
Jä, nach däm Trottel kah jo ächt e jede koo

S?'absi Schneider und der Lewin drätte zrugg
Sinn si amtsmied oder isch's der z'grossi Drugg
Der woori Grund derfir, de dien mir langsam raffe
Die wänn nach 12 Joor Ferie ändligg wiider schaffe

2007

Dr glaini Vosseler dä faart quer yber's Meer
In sym Solarböötli gniesst er die Meened sehr
"Das isch doch nyt", maint d'Gigi Oeri bitz verlääge
In somne Solarium bin ych scho länger glääge

Im Baselland-Dail vo der BaZ, es isch verruggt
Wird s'Neuschte uss em Baselbiet grad ganz frisch druggt.
Zem Byspiil z?Reigoldswil, das s?liggt is uff em Maage
Deert heig der Fuchs em Haas vergässe "Guet Nacht"" saage

Mucksmyyslistill, me heert kai Quietsche und kai Knarre
Es isch e Wooltat so der Stainebäärg z'befaare
Gar kai Ton, jä in de Ohre duets nymm weh
S'isch fascht so ruhig wie bimne Spiil vom FCB

S'Barbie Schneider losst z'Glaihyynige lo boore
Sither fliegt ys albott d'Wohnig halb um d'Ohre
Dr Grund fürs Boore hänn mir beidi scho lang checkt
Die gniesst doch nur dass sich ihr Bett wieder bewegt

Im Summer simmer zu der WM bi de Schwoobe
D?Gaschtfrindschaft dien die mit ihrem Slogan loobe
"Zu Gast bei Freunden", dien die Dütsche stolz verkinde
Jä he, sit wenn sinn denne d?Schwoobe unseri Frinde?

Mir hänn e Värs iiber d?EURO 08 welle bringe
Und uns entschiede, dass mir dää denn doch nit singe
Er wär zwoor sauglatt, doch fir uns wär das ä tyyre
D'UEFA wott jetz au fir EM-Värs Gebyyre

Jetzt wänn si s'Qualme an de Arbetsblätz verbiete
Und uns alli vor em Passivrauch behiete
Doch nur im Bundeshuus kasch paffe, ganz in Rueh
Was die deert mache het mit Arbet nit vyyl z'due

Ain kaa hilfloos syyni Schueh nimm sälber binde
ain sy Brille scho zem zähnte mool nimm finde
was hänn si gmacht, was hänn sie gsait -sie hänns vergässe
sinn aber alli bi der Swissair z ooberscht gsässe

2006

Im Vatikan hänn si sich fir e Neie bsunne
der Papa Ratzi het als Bayer dytlig gwunne
doch bi der eerschte Mäss scho het er sich verhaue
und bim Urbi/Orbi lut "Oozapft is" gschraue

Unsere Bäär isch zum im Winter kenne pfuuse
nach Italie-n-ab und uus Graubinde uuse
däm aarme Mutz goots dängg halt wie bi uns de maischte
wär ka sich in der Schwyz scho d Ibernachtig laischte

D'Sturmtief z'USA het me benennt nach Fraue,
Katrina, Wilma, Rita hänn alles zaemmeghaue
Z?Baasel isch es Gott sei Dangg nimm ganz so schitter
Will s'Duurdieff Zanolari ziet jetzt aentlig wyter

Wo mir bim Faare ins M-Budget-Handy lalle
Isch is s'Prix Garantie Sandwich grad aabegfalle
E Schugger sehts, es git e Buess, dä Maa blibt hart
Doch immerhin gits Pynggt fir d'Supercard

Bi der SBB kasch s'Rauche jetzt vergässe
Muesch warte oder Niggotyynkaugummi frässe
E dritti Meegligkait wänn mir eich nit verschwyyge
Kasch zem Rauche schnäll bim Stromuusfall uusstyyge

Zem Keschte spaare soll dr 5-Räppler verschwinde
Die Ydee macht sich in Lieschtel kaini Frinde
So mien d'Baselbieter glyy, die lyyde Gwaale
Fir d'Subventione s'dopplete an Baasel zaale

E Sprichwort said dass z'vyyli Kech dr Brei verdäärbe
jä sii, die Wyyshait gits scho lang uff dääre Äärde
aber ai Koch kennsch, dää schafft das ganz elai
faart schnäll uff Roeschenz, verdirbts und goot denn hai

Mir wänd eu herzlich da bi eus willkchomme heisse
Da isch de Hit, chasch dich vor Lache grad weg schmeisse
Ou i wott hie bi euch baud afa schaffe
So deents wenn d'hittzudaags kli Kaffi Baal duesch gaffe

Grad nach der Fasnacht wäärde mir in d'Ferie goo
Gratis und franko richtig Süde d'Schwyz verloo
Vo Milhuus e goots ab Terminal B3
In Zälle 8 im Flugi vo der CIA

Nach em Match in Istanbul sinn baar so Fleegle
In de Katakombe mit Schwyzer go schleegle
Wurum hänn die sich nit an Zubi ane draue
Dää hätt bim zrugg gää soowisoo drnäbe ghaue

Mir mien jetzt wyter zie, es isch jo wiirgglig schaad
doch wenns eich gfalle het hänn mir e Tipp baraat
Druggsch 482631 uff Dim Deelefoon
Scho hesch de Schnitzelbangg als neie Glingeldoon